د آى پي اېل په نوم د هند غوره ليګ سياليو كې د ګډون په هدف د افغانستان د كركټ ملي لوبډلې آلراونډر لوبغاړى محمد نبي پرون له كابل نه هند ته ورسېد.
څه موده وړاندې د دغو سياليو لپاره ليلامۍ کې افغان لوبغاړي محمد نبي او راشد خان د سنرايزرز حيدراباد لوبډلې له خوا وپېرل شول.
راشد خان په څلوېښت ميليونه هندي روپيو، چې شاوخوا ۶ سوه زره ډالره کېږي او محمد نبي په درې ميليونه روپيو، چې شاوخوا ۴۵ زره ډالره کېږي، پلورل شوي دي.
محمد نبي رسنيو سره خبرو کې هيله ښودلې، چې دى او راشد خان به د سنرايزرز حيدراباد لوبډله کې ښه وځلېږي.
د آى پي اېل لوبې د راتلونکې چهار شنبې په ورځ پيلېږي او په لومړۍ لوبه كې د يادو دواړو افغان لوبغاړو د لوبېدو چانس زيات دى.
