په پکتيا کې هر کال د هېواد د خپلواکۍ د بېرته ګټلو کليزه بېلابيلې ټولنې، سياسي ګوندونه او ځوانان تر ډېره په خوښيو او شعار ورکولو نمانځي، خو دا ځل د ودان افغانستان ګوند پکتيا ولايتي کمېټې په نوښت سره د دغې ورځې د نمانځنې لپاره د شاه امان الله خان د ژوند، اماني او طرزي افکارو تر عنوان لاندې علمي سيمينار جوړ کړى و.
دغه سيمينار، چې تېره ورځ له غرمې وروسته پيل شو او تر ماښامه يې دوام وکړ، ګډونوالو په کې خپلې ليکل شوې مقالې ولوستلې.
د ودان افغانستان ګوند پکتيا ولايتې کمېټې مشر نثار حبيب له کليد سره په خبرو کې وويل، له دغه کار څخه يې هدف خلک د ازادۍ په مفهوم پوهول، د خپلواکۍ د ساتلو لارې روښانه کول اود ازادۍ د مبارزينو نمانځنه ده.
نوموړي له نورو مدني ټولنو، سياسي ګوندونو او ځوانانو وغوښتل، چې ورته پروګرامونه د هېواد په بېلابېلو برخو کې جوړ کړي.
د ودان افغانستان ګوند غړى نصير غورځنګ وايي، هدف يې د اماني او طرزي افکارو ترويج او د ازادۍ د سر لارو نيمګړو ارمانونو ته رسېدنه ده.
د هغه په خبره، افغانان بايد اوس په دې پوه شوي وي، چې د بهرنيانو په استخباراتي فتواوو او ويناوو ونه غولېږي، بلکې دوى د په يووالي د خپل هېواد د ابادۍ او د خلکو د هوسيانې لپاره کار وکړي.
د ودان افغانستان غړي وايي، دوى د عام خلکو د ذهنونو د روښانه کولو لپاره د روښانتيا د لکچرونو لړۍ پيل کړې، چې د پکتيا ترڅنګ په يو شمېر نورو ولايتونو کې هم دوام لري.
