د غزني قومي مشران او د ولايتي شورا غړي وايي، د دې ولايت په بېلا بېلو ولسواليو كې ميشت امنيتي سرتېري او په ځانګړي ډول پوليس دولتي وسلې او مهمات پر وسله والو مخالفينو پلوري، خو مسوول امنيتي ارګانونه بيا وايي په دې اړه به تر شپږو مياشتو وروسته د پوليسو ټولو ليكو كې اصلاحات راولي.
د غزني د نجات شورا مشر خليل الله هوتك په دې اړه كليد ته په ځانګړې مركه كې وويل، داسې اسناد او شواهد لري چې د ولايت په بېلا بېلو ولسواليو كې امنيه قومندانان او د پوليسو منسوبين پر مخالفو وسله والو پوځي مهمات پلوري.
د غزني قومي مشران او د ولايتي شورا غړي وايي، د دې ولايت په بېلا بېلو ولسواليو كې ميشت امنيتي سرتېري او په ځانګړي ډول پوليس دولتي وسلې او مهمات پر وسله والو مخالفينو پلوري، خو مسوول امنيتي ارګانونه بيا وايي په دې اړه به تر شپږو مياشتو وروسته د پوليسو ټولو ليكو كې اصلاحات راولي.
د غزني د نجات شورا مشر خليل الله هوتك په دې اړه كليد ته په ځانګړې مركه كې وويل، داسې اسناد او شواهد لري چې د ولايت په بېلا بېلو ولسواليو كې امنيه قومندانان او د پوليسو منسوبين پر مخالفو وسله والو پوځي مهمات پلوري.
دى زياتوي، د پوليسو دې كار وسله وال ځواكمن كړي او د امنيتي وضعيت په خرابېدو كې يې مرسته كړې ده:(( زه داسې اسناد او شواهد لرم،چې د یوي ولسوالۍ امنیه قومندان طالبانو ته زیګویک ورکړی، داسې اسناد لرم چې د مرکز په ګډون په ګڼو ولسوالیو کې د ملي او سیمه يیزو پولیسو منسوبینو، پیکاګانې، کلاشینکوفونه او مرمۍ یې پر طالبانو پلورلي او اوس یې هم پلوري.))
هوتك زياته كړه، پولیس په لرې پرتو سیمو کې په لوی لاس ډزې کوي او وروسته خپلو لوړو مقامونو ته راپور ورکوي چې په جګړه کې یې زیاته اندازه مهمات مصرف کړي دي.
هوتك په دې برخه كې دكورنيو چارو وزارت په فساد او كمزوري مديريت تورنوي چې په وينا يې له همدې كبله د پوليسو په ليكو كې مفسدو او خاينو كسانو ځاى موندلى دى.
بلخوا د غزني د ولايتي شورا غړي هم د پوليسو له لوري پر مخالفو وسله والو د پوځي مهماتو پلور تاييدوي، خو هيله من دي چې د امنيې نوى قومندان به دغې ستونزې ته ژر تر ژره د پاى ټكى كېږدي.
د غزني د ولايتي شورا غړى حسن رضا يوسفي كليد ته په خپلو خبرو كې دا مسئله اندېښمنوونكې بللې خو زياته يې كړه دا ستونزه له ډېر پخوا څخه موجوده وه مګر اوس ورته د امنيه قومندان مل پاسوال امين الله امرخېل ډاډ وركړى چې هرڅه به سم كړي: ((د پولیسو له لوري د تیلو، او وسلو پلورل نوې خبره نده، دا لړۍ له مخکې روانه ده، خو اوس چې نوی امنیه قومندان راغلی، یوه زیاته اندازه وسلې چې مخکې نه وې راجستر شوې، خو د امنیه قومندانۍ منسوبینو ور سره انتقالولې اوس ثبت شوي او موږ په جریان کې یوو چې ښاغلى امرخیل په ې برخه کې اصلاحات پیل کړي دي.))
يوسفي زياته كړه، كه د ملي پوليسو په ليكو كې د دغې ستونې مخه ونه نيول شي نو دولتي مهماتو ته به د وسله والو مخالفينو لخوا په اسانه بيه لاسرسى د نظام او امنيت لپاره خورا زيانمنوونكې چاره وي :(( تاسو شاهدان یاست چې په غزني کي د ۹۲-۹۳ او ۹۴ پر مهال په مياشتو مياشتو د غزني د ښار په منځ كې هره ورځ امنيتي منسوبين، قومي مخور او دولتي كاركوونكي وژل كېدل خو قاتلين به يې تښتېدل، دغه راز د امنيه قومندانۍ په ۱۰۰ مترۍ كې هره شپه وسله والو پر امنيتي پوستو بريدونه كول، مګر داسې وخت خداى مه كړه بيا هم راتلونكى دى كه د پوليسو د فساد مخه ونه نيول شي.))
دا په داسې حال كې ده چې د غزني امنیه قومندان مل پاسوال امین الله امر خیل هم له کلید سره په خبرو کې د امنیتي منسوبینو، په تېره بیا د پولیسو له لوري پر وسله والو مخالفینو د پوځي مهماتو د پلور پخلی كړى دى.
نوموړي زیاته کړه له یوې میاشتي راهیسي یې چي د دې ولایت د امنیه قومندان په توګه دنده پیل کړې، له خپلې ادارې څخه یې اصلاحات پیل کړي او ژمنه كوي چې تر شپږو میاشتو به د پولیسو په ټولو ليكو کې مفسد او خاین کسان تشخیص، له دندو ګوښه او عدلي ارګانونو ته ور وپیژني:(( په تېره يوه مياشت كې چې ما دنده پيل كړې، دا راته جوته شوې چې د پولیسو په لیکو کې ګڼې د فساد چارې لكه د خیالي پولیسو شتون، په اعاشه کې درغلي، د تیلو پلورل، د دولت پر مخالفینو او نورو ډلو د وسلو او پوځي مهماتو پلورل موجود دي، اصلاحات مې پیل کړي یو مفسد او خاین کس به هم د پولیسو په کتار کې پرینږدم، خو دا د یوې ورځې او یوې میاشتې کار ندی.))
امرخیل دغه راز د پولیسو او ټولو امنیتي ارګانونو په لیکو کې د مفسدو کسانو د پیژندلو په برخه کې له خلکو څخه د همکارۍ او مرستې غوښتنه وکړه.
د یادوني وړ ده چې مخکې له دې هم قومي مشرانو، د ولایتي شورا غړو او مدني فعالانو په غزني کې د امنیتي منسوبینو له لوري پر وسله والو مخالفینو د وسلو او پوځي مهماتو د پلور ادعاوې شوې وې،خوهغه مهال پخوانیو امنیه قومندانانو دغه ادعاوې رد او بي اساسه بللې.
