یادې ډلې ویلي چې د سرحدي دروازې ته څېرمه یې د اسراییل پوځي اډه په نښه کړې ده.
له یادې ډلې څخه په خپره شوې خبرپاڼه کې راغلي چې پر دې پوځه اډه یې لس توغندي ورتوغولي دي.
دوی ویلي، هدف یې د کرم شالون دروازه نه؛ بلکې پوځي اډه وه.
په همدې حال کې اسراییلي چارواکو تایید کړې چې په دغه برید کې د دوی درې پوځیان وژل شوي دي.
د سرچینو د معلوماتو له مخې، په برید کې لس تنه نور سرتېري ټپیان شوي چې د ځینو وضعیت نازک دی.
کرم شالون دروازه، چې غزې ته د بشري مرستو رسولو مهمه لار هم ګڼل کېږي، له دغه برید وروسته تړل شوې ده.
پر اسراییلو دا برید په داسې حال کې کېږي چې د مصر په پایتخت قاهره کې د غزې اوربند په اړه خبرې هم بېرته پیل شوې.
