وروسته له هغه چې د ایران سپاه پاسداران په دغه برید کې د خپلو څلورو غړیو وژل کېدل تایید کړل، د ایران حکومت ویلي چې د ځان د دفاع حق لري او د دغه برید ځواب به ورکوي.
ایسنا خبري آژانس د ایران د بهرنیو چارو وزارت ویاند ناصر کنعناني له قوله ویلي چې د سوریې پر ځمکنۍ بشپړتیا تېری کول، د اسراییلو د رژیم د عجز او کمزورۍ نښه ده.
د ده په وینا، د ایران حکومت په مناسب وخت او ځای کې د سوریې پر پایتخت د شوي برید په ځواب کې د ځوابي اقدام حق لري.
د سوریې د بشري حقونو د څار سازمان پرون ویلي، د دمشق پر مزه سیمه د اسراییلو په برید کې ۱۰ کسان وژل شوي دي.
د ایران سپاه پاسداران ویلي، په وژل شویو کې څلور کسان د دوی پوځي سلاکاران وو، خو راپورونه وایي، په دغو کسانو کې یو یې د سوریې لپاره د سپاه پاسداران استخباراتي مسوول و.
د اسراییلو او حماس تر منځ د جګړې له پیل راهیسې په منځني ختیځ کې شخړې ورځ تر بلې زیاتېږي.
