سيد كرم كې لمريزه برېښنا فعاله شوه

د پكتيا په سيدكرم ولسوالۍ كې۴۰۰ كورونه او  لسګونه  دكانونو په لمريزې برېښنا روښانه شول. په ياده ولسوالۍ كې دا پروژه چې ۱۰۵ كيلواټه برېښنا توليدوي، په دې ولايت كې د ولايتي بيارغونې

د پكتيا په سيدكرم ولسوالۍ كې۴۰۰ كورونه او  لسګونه  دكانونو په لمريزې برېښنا روښانه شول.

په ياده ولسوالۍ كې دا پروژه چې ۱۰۵ كيلواټه برېښنا توليدوي، په دې ولايت كې د ولايتي بيارغونې د ډلې يا P.R.T  له خوا د دووه عشاريه پنځه مليونه ډالرو په لګښت پلې شوې چې شاوخوا  ۴۰۰ كورونه او  لسګونه  دكانونو يې روښانه كړي دي.

خو په سيمه كې مېشت اوسېدونكي وايي چې د دې پروژې لمنه دې د سيدكرم ولسوالۍ ولسواليو،كليو او بانډو ته هم وغځېږي.

د سيد كرم ولسوالۍ د مشك كلي يو تن اوسېدونكى حاجي ګلاب شاه چې د سيدكرم ولسوالۍ په ښارګوټي كې د خياطۍ دكان لري وايي چې په دې ډېر خوښ دى چې دكان يې په لمريزه برېښنا روښانه شو: (( خو  په كور كې اوس هم د پلار، نيكه زاړه څراغ ته ناست يو.))

ګلاب شاه وايي : (( كه  دولت او بهرنيان په كليو كې هم داسې برېښنا راته جوړه كړي په دې سره به په سيمه كې مېشت ځنګلونه هم له خطره وژغورل شي.))

د يادې ولسوالۍ يو بل اوسېدونكى محمد الله هم ورته نظر لري او وايي چې د لمريزې انرژۍ جذب كوونكې ښېښې دې د ولسواليو ټولو كليو ته ولګول شي.

دى وړاندې وايي: ((اوس هم ډېر كليوال دكانونو ته ټليفونونه د چارجولو لپاره راوړي.))

د نوموړي  په خبره، د لمرانرژي ګټه په دې كې ده چې د پيسو له مصرفه به خلاص وي.

د دې لمريزې  برېښنا د سيسټم په اړه د دې بهير يو تن مسؤل او مسلكي انجنير ميرزا محمد وايي: (( د دې لمريزې برېښنا په جوړېدو  ۳۰۰  كورونه او لسګونه دكانونه په برېښنا روښانه شول.))

د انجينر ميرزا محمد په وينا، دوى هڅه كوي څو نورو كورونو ته هم برېښنا وركړي: (( خو د ټولې ولسوالۍ لپاره بسنه نه كوي.))

د پكتيا د برېښنا او انرژۍ  رئيس لعل الدين وايي چې دا پروژه يې د سيمې د خلكو په غوښتنه پلې كړې او په راتلونكې كې به په نوروسيموكې هم ورته پروژې پلې كړي.

ياده سرچينه زياتوي، دوى كوښښ كوي چې خلكو ته سهولت رامنځ ته كړي: (( په دې اړه مو د نورو ولسواليو پلان هم په نظر كې نيولى چې په وخت سره به دا نورو ولسواليو ته هم وغځوو.))

رئيس دا ژمنه هم وكړه چې د سيد كرم ولسوالۍ ترڅنګ به په دوو نورو ولسواليو احمد اباد او څمكنيو  كې هم ورته پروژې پلې كړي.

پاتې دې نه وې چې د پكتيا ولايت دا مهال ۹۵ فيصده د برېښنا له نعمته بې برخې دی.