کمک‌های بشردوستانه چین به زلزله‌زده‌گان امروز به افغانستان ارسال می‌شود

وانگ ونبین، سخنگوی وزارت امور خارجه چین در یک نشست خبری گفت که این کشور کمک‌های اضطراری به‌ارزش 50 میلیون ین را طی یک پرواز چارتر به افغانستان می‌فرستد.

در همین‌حال چین سونگ، معاون وزارت امور خارجه چین در بخش آسیایی، در دیدار با سید محی‌الدین سادات، سرپرست سفارت افغانستان در بیجینگ گفت که علاوه بر این، حکومت ایالتی شین‌جیانگ این کشور نیز یک میلیون ین، برای زلزله‌زده‌گان کمک می‌کند.

سادات نیز از کمک‌های دولت چین و حکومت ایالتی شین‌جیانگ، 200 هزار دالر کمک شرکت قراردادی پروژه مس عینک و 200 هزار دالر از سوی کمک صلیب سرخ چین برای زلزله‌زده‌گان افغانستان، قدردانی کرد.

او تاکید کرد که این کمک‌ها به‌گونه شفاف، به افراد مستحق توزیع خواهد شد.

این در حالی‌ست که پیش از این نیز کشورهای زیادی، برای زلزله‌زده‌گان در ولایت‌های پکتیکا و خوست، کمک‌های بشردوستانه ارسال کرده‌اند.