د قزاقستان کاز انفورم خبري آژانس د خبر له مخې دا موافقه کابل ته، د ازبکستان د سرپرست صدراعظم عبدالله اریپوف په مشرۍ د جګپوړي پلاوي د سفر پرمهال شوې ده.
بلخوا د صنعت او سوداګرۍ وزارت سرپرست نور الدین عزیزي وايي چې د افغانستان، ازبکستان او پاکستان ترمنځ د ترانزیتي طرحه او پلان لاسلیک شوي او پر جزییاتو یې کار روان دی.
دا موافقه د اریپوف او د ریاست الوزا د اقتصادي مرستیال ملا عبدالغني برادر په حضور کې لاسلیک شوې ده.
د راپورونو لهمخې د افغانستان او ازبکستان ترمنځ د سوداګرۍ کچه د سږني کال له پیله څه باندې ۴۶۰ میلیون ډالرو ته رسېدلې.
د صنعت او سوداګرۍ وزارت د معلوماتو له مخې ، د افغانستان، ازبکستان او قزاقستان ترمنځ هم یوه درې اړخیزه موافقه کېدونکې ده.
همداراز د ازبکستان، ایران او افغانستان ترمنځ د یوې موافقې په اساس به د چاه بهار بندر له لارې د ازبکستان مالونه تودو اوبو ته ورسېږي.