د امارتي ادارو د یو کلنو لاسته راوړنو د پروګرامونو په دوام، د امربالمعروف ، نهی عن المنکر او شکایتونو اورېدو وزارت د سه شنبې په ورځ خبریالانو ته د خپلو فعالیتونو په اړه معلومات ورکړل.
د دغه وزارت د چارواکو په وینا، د هرې ورځې په تېرېدو سره له دوی سره د خلکو باور او همکاري زیاتېږي او په تېر یوه کال کې یې په بېلابېلو برخوکې ډېر ډېر فعالیتونه تر سره کړي دي.
د دغه وزارت د پلان او تقنین رئیس شیخ محب الله مخلص وايي، په دې موده کې له ۹ زره ډېر شکایتونه ثبت شوي، چې له دې ډلې تر ۵ زرو ډېر یې څېړل شوي دي.
((اووه سوه نهه اویا کیسونه چې زنانه د میراثي حقونو نه محرومې وې بحال کړې شوې او د ښځو په ضد د تشدد دوه زره کیسونه هم رامخې ته شوي دي.))
نوموړی وايي، چې د دغه وزارت ولايتي رياستونو له ١٣٠٠ څخه زياتې د دښمنۍ قضيې په دوستۍ بدلې کړې دي.
په ورته وخت کې د یاد وزارت مسلکي معین شیخ محمد فقیر محمدي وايي، د دغه وزارت په چوکاټ کې د ښځو لپاره ټولې لازمې اسانتیاوې په پام کې نیول شوي، څو وکولای شي په ازاده توګه خپل شکایتونه ثبت کړي.
((موږ په وزارت کې د ښځو لپاره له ټولو اړینو اسانتیاوو سره یو جلا ځای جوړ کړی دی. هغوی کولای شي په ازاده توګه خپل شکایتونه ثبت کړي.))
د نوموړي په وينا، دغه اصلاحات يوازې د هېواد په ملکي وګړو او عامو خلکو پورې محدود نه دي، بلکې هغه پوځي کسان چې سرغړونې يې کړې، پوځي محکمې ته هم معرفي شوي دي.
د امربالمعروف ، نهی عن المنکر او شکایتونو اورېدو وزارت دغه لوړپوړی چارواکی ټینګار کوي چې د دغه وزارت هیڅ یو محتسب حق نه لري چې له خلکو سره ناوړه چلند وکړي او که کوم ناوړه کار وکړي، جدي چلند به ورسره وشي.
د يادونې وړ ده، چې د یاد وزارت چارواکو دا هم وویل چې د دوی لخوا د څه باندې ٤٠٠ جادوګرانو نيول، د موسيقۍ د ٢١ زره آلو له منځه وړل، د شرابو د پلور د ٢٥ مرکزونو بندول او د ٢٥ زره غیر اخلاقي ويډيوګانو د پلور مخه نيول شوې ده.
کلید ګروپ په ټویټر او فیسبوک کې وګورئ
