د ملګرو ملتونو د وګړو صندوق په یوه راپور کې ويلي چې په غزه کې خوارځواکي د امیندوارو مېرمنو او نویو زیږېدلو ماشومانو پر وړاندې ستر ګواښ دی او د مړو زېږون کچه، د وزن کمېدل او د ماشومانو وده په ټپه ولاړ دي.
راپور کې ویل شوي چې په غزه کې د کم وزن لرونکو ماشومانو زېږون په چټکۍ سره د زیاتېدو په حال کې دی.
د ملګرو ملتونو د وګړو صندوق په غزه کې د سمدستي اوربند غوښتنه کړې او ویلي یې دي چې دا د دوی د ژوند ژغورلو لپاره د حل لاره ده.
بلخوا په غزه کې د فلسطیني حکومت د رسنیو دفتر ویلي چې ۳۴ ماشومان د قحطۍ او لوږې له امله مړه شوي او ۳ زره ۵۰۰ ماشومان د خوارځواکۍ او د خوړو د نشتوالي له امله د مړینې له ګواښ سره مخ دي.
تېره میاشت د روغتیا نړیوال سازمان ویلي وو چې په غزه کې د اسرائیل بریدونو تر ۸۰۰۰ ډېر ماشومان چې عمرونه یې تر پنځو کلونو کم دي، له سختې خوارځواکۍ سره مخامخ کړي دي.
د فلسطین روغتیا وزارت د تازه شمېرو له مخې، په غزه کې د اسراییلو په بریدونه کې تر اوسه ۳۸زره ۹۸۳ تنه مړه شوي او ۸۹زره ۷۲۷ نور ټپیان دي.
کلید ګروپ په ټویټر او فیسبوک کې وګورئ
