د دغه وزارت ویاند عبدالقهار بلخي ویلي چې په دې ناسته کې د بشري مرستو د ميکانيزم په برخه کې د طبيعي پېښو او اجباري راستنو شوو کډوالو د ځای پر ځای کولو او د روغتيا برخو تر څنګ، د سوداګریزو اړیکو او له کابل سره د بیجینګ د مرستو په اړه بحثونه شوي.
د بلخي په خبره، چینايي لوري ویلي چې له افغان کډوالو سره د یو میلیون «ینو» په مرسته کې به د افغان حکومت غوښتنې په پام کې ونیسي.
دغه راز د یاد هېواد د سره صلیب ټولنې بیا ژمنه کړې چې د زړه پر ناروغۍ د اخته ماشومانو درملنې لپاره به زمینه برابره کړي.
سرچینې زیاته کړې چې په دې ناسته کې د دواړو هېوادونو ترمنځ د سوداگرۍ پر زياتوالي، چين ته د افغان توکو د صادرولو زمينې برابرولو او په افغانستان کې د کانونو او معاصرې سوداگرۍ په برخه کې د چين د پانگونې فرصتونو په اړه هر اړخیزې خبرې وشوې.
په افغانستان کې د نفتو د استخراج کچې لوړولو او د لوگر مس عینک کان د استخراج د پيلولو په برخه کې د وروستيو پرمختگونو او د واخان کوريډور د اهميت، احتمالي گټو او د دغه کوريډور د پرانيستلو پر امکاناتو هم بحثونه شوي.
باید یاده شي چې واک ته د سرپرست حکومت تر رسېدو وروسته، چین په افغانستان کې پانګونه زیاته کړې او له افغانستان سره یې اړیکې هم تر پخوا پراخې شوې دي.
