«سږکال په کندهار کي خټکي پر ۸۰۰ هکټاره او هندوانې پر ۶۰۰ هکټاره مځکه باندی کرل سوی تیر کال ته په کتو سره حاصل کم سوی خو کیفیت یې ښه دي.»
د هغه په وینا، سږ کال په ځینو ولسوالیو کې د خټکیو او هندواڼو پالېزونو ځای پنبې او نورو کرنیزو توکو نیولی، ځکه پالېزونه کم شوي.
په دامان ولسوالۍ کي د خټکیو او هندوانو کروندګر حسیب الله وایي، سږ کال د خټکیو او هندواڼو حاصلات ښه وو، خو حاصلاتو په وروستیو کې پالېزونو مرضونه وکړل او کښتونو ته یې ورساوه.
«سږ کال کښتونو ښه دي ځکه سږ کال هوا ښه وه خو په اخیره کي یې مرضونه وکړل نو کښت یو څه زیانمن سوو.»
د خټکیو پلورونکي بیا وایي، سږ کال خټکي او هندواڼې ځکه لږ دي چې د وچکالۍ له امله ډېرو خلکو نه دي کرلي.
د خټکیو او هندوانو پلورنکي نجیب الله وایي، پخوا به یو موټر خټکي له اته څخه تر لس زره افغانۍ وه خو سږ کال په دیارلس زره افغانۍ پلورل کېده.
«سږ کال خټکي کمزوري دي، ځکه اوبه نشته، زموږ زیاتې اوبه نورو هېوادونه ته روانې دي، باید زموږ اوبه را وګرځول شي، بیا کېدای شي مېوه ارزانه وي.»
سږ کال له کندهار څخه نورو هېوادونو ته هم خټکي او هندواڼې نه دي صادر شوي او د نورو کرنیزو توکو تر څنګ وچکالۍ او د اوبو نشتوالي یې پر حاصلاتو منفي اغېز کړی.
