رئیس جمهور غنی با رئیس جمهور تاجکستان صحبت کرد

بر اساس یک اعلامیه ارگ، رئیس جمهور غنی با امام علی رحمان؛ رئیس جمهور تاجکستان، در مورد شهروندان افغان که بر اثر خشونت طالبان در مناطق مرزی، به این کشور پناه برده‌اند، از طریق تلفون صحبت کرد.
منبع، می‌افزاید که در این تماس تلفونی، رئیس جمهور تاجکستان از وضعیت پیش آمده، ابراز نگرانی کرده است.
از سویی هم، غنی از حسن نیت و حس بشردوستانه تاجکستان در برابر شهروندان افغان قدردانی نموده، گفت که دولت افغانستان در قبال شهروندان خود مسوول است.
این درحالی‌ست که در پی حمله‌های طالبان در ولایت‌های بدخشان و کندز و تصرف چندین ولسوالی از سوی این گروه، ده‌ها نظامی افغان به خاک تاجکستان پناه برده‌اند.