گذرگاه‌های مرزی میان افغانستان و پاکستان به صورت موقت باز شد

گذرگاه‌های مرزی چمن-سپین‌بولدک و تورخم، به صورت موقت به روی افغان‌های که می‌خواهند به افغانستان برگردند، باز شد.
عایشه فاروقی، سخنگوی وزارت امور خارجه پاکستان، در یک تویتی نگاشته که به درخواست حکومت افغانستان، این دوگذرگاه از دوشنبه تا پنجشنه هفته جاری، باز خواهد بود.
بر اساس معلومات مقام‌های افغان، قرار است در این مدت، همه روزه دو هزار تن از پاکستان، وارد افغانستان شوند.
در همین حال مقام‌های ولایت ننگرهار می‌گویند، افرادیکه از طریق گذرگاه تورخم وارد افغانستان می‌شوند، پس از معاینات صحی، از 14 الی 15 روز، در کمپ‌ قرنطین در این ولایت، نگهداری خواهند شد.