د کرملین ویاند دیمیتري پیسکوف ویلي چې په دې پلاوي کې د روسیې د بهرنیو چارو وزیر سرګي لاوروف او د کرملین د بهرنۍ پالیسۍ سلاکار یوري یوشاکوف شامل دي چې له امریکايي چارواکو سره به وګوري او د اوکراین د جګړې د پای ته رسېدو او له واشنګټن سره د اړیکو د بیا پیلولو په اړه خبرې وکړي.
له بلې خوا د امریکا د بهرنیو چارو وزیر مارکو روبیو هم اسرائیلو ته تر سفر وروسته، د دوشنبې په ورځ سعودي عربستان ته رسېدلی دی.
د امریکايي سرچینو په وینا، په دغه سفر کې به د ډونالډ ټرمپ د ملي امنیت سلاکار مایک والټز او د منځني ختیځ په چارو کې د سپینې ماڼۍ استازی سټیو ویټکوف هم ګډون ولري.
دا په داسې حال کې ده چې د اوکراین جمهور رئیس ولادیمیر زېلېنسکي متحده عربي اماراتو ته سفر کړی او ټاکل شوې د دغه هېواد له چارواکو سره خبرې وکړي.
د یادونې ده چې اوکراین چې د جګړې اصلي اړخ دی په ریاض کې خبرو ته نه دی بلل شوی او د اروپايي هېوادونو استازي هم نه دي حاضر شوي.
