د یادو فابریکو مسوولین وايي، په هېواد کې د امنیت ټنګښت او د ځینو اقتصادي ستونزو حل د دې لامل شوی، چې دغه فابریکې بېرته فعالې شي.
د هرات ولايت د صنايعو او کانونو د خونې مشر حميدالله خادم وايي، چې د يادو فابريکو بندېدل د دغه ولايت په صنعتي ښارګوټي کې د صنعت د ټکني کېدو لامل شوی و.
“د جمهوري نظام په تېرو شپږو میاشتو کې په صنعتي ښارګوټي کې ګډوډیو او ناامنیو د سوداګرو او پانګوالو فعالیتونه محدود کړي وو. دغه کار د دې لامل شو چې صنعت له رکود سره مخ شي، خو په هېواد کې د ناامنیو او ستونزو له منځه تللو سره، هره ورځ د فابریکو فعالیت شاهدان یوو او او فابریکو بیا فعالیت پیل کړی دی.»
بل خوا د هرات ولایت د صنعت او سوداګرۍ رئیس بشیر احمد سیرت وايي، د تولیدي فابریکو په فعالېدو سره یو شمېر ځوانانو ته د کار زمینه برابره شوې ده.
سيرت زياتوي چې اوس مهال د هرات ولايت د صنعتي ښارګوټي په فابريکو کې څه باندې پنځوس زره کسان په کار بوخت دي.
“په ټوليزه توګه د هغو شمېرو له مخې چې موږ یې لرو، د هرات ولايت په صنعتي ښارګوټي کې شاوخوا ٥٠ زره کسان په مستقيم ډول کار کوي او د کار زمينه ورته برابره شوې ده، په غیر مستقیم ډول هغو کسانو ته چې د خرڅلاو او سوداګرۍ په برخه کې کار کوي، د کار زمینه هم برابره شوې او شمېر یې ډېر دی.”
په ورته وخت کې اقتصادي کارپوهان هم د تولیدي فابریکو فعالیت بیا پیل د کاري فرصتونو په رامنځته کولو کې مهم بولي.
د اقتصادي چارو کارپوه فیض محمد محمدي وايي، په دغو فابریکو کې خلکو ته د کار زمینه برابرول به بهرنیو هېوادونو ته د ځوانانو د تګ مخه ونیسي.
“د فابریکو جوړول له اقتصادي ستونزو سره د مبارزې لپاره یو اغېزمن ګام دی. د هرې تولیدي فابریکې په فعالېدو سره زیات شمېر ځوانانو ته د کار زمینه برابرېږي. د فابریکو خاوندانو ته پکار ده، چې خپلو تولیداتو ته پاملرنه وکړي او د کار د لازیاتو فرصتونو د برابرولو لپاره د هېواد له دننه څخه خپل مواد عرضه کړي.»
د هرات ولایت د صنایعو او کانونو خونې د معلوماتو له مخې، اوسمهال د دغه ولایت په صنعتي ښارګوټي کې څه باندې ۸۰۰ فابریکې فعالې دي.
د دوی په خبره، یوازې په تېرو درېیو کلونو کې په دغه ښارګوټي کې تر ۳۰۰ ډېرې فابریکې جوړې شوې او یا یې بیا فعالیت پیل کړی دی.
