د بهرنیو چارو وزارت ویاند عبدالقهار بلخي په خپله ایکس پاڼه لیکلي چې مولوي بدرالدین حقاني د افغانستان د اسلامي امارت د سفیر په توګه خپل باورلیک د متحده عربي اماراتو د بهرنیو چارو وزارت د تشریفاتو مرستیال سیف عبدالله الشامسي ته د یو لړ مراسمو په ترڅ کې وسپاره.
بلخوا قزاقستاني رسنیو هم ویلي چې د دغه هېواد د بهرنیو چارو وزارت په استانه کې د افغانستان د سفارت لپاره د اسلامي امارت لهخوا د نومول شوي شارژدافېر محمدالرحمن رحماني باورلیک منلی دی.
د یادونې ده چې دا له چین وروسته چې د تېر کال په ډسمبر کې یې په پېکېنګ کې د اسلامي امارت سفیرمنلی و، دوهم هېواد دی چې د اسلامي امارت د یوه لوړپوړي ډیپلومات باورلیک مني.
تر دې وړاندې د بهرنیو چارو سرپرست وزیر امیرخان متقي په یوه غونډه کې ویلي وو چې اسلامي امارت تراوسه د نړۍ له نژدې څلوېښتو هېوادونو سره ډیپلوماتیکې اړیکې ټینګې کړي دي.
کلید ګروپ په ټویټر او فیسبوک کې وګورئ
