تر اوسه د دغو کسانو د هویت په تړاو څه نه دي ویل شوي، خو یو شمېر سیاسي شنونکي وایي چې دغه ډول فشار عملي کول د اسلامي امارت او نړۍ تر منځ پر سیاسي تعامل منفي اغېز کوي.
سیاسي شنونکي عبدالجمیل شیراني وایي:
«امریکا په تېرو شلو کلونو کې پر افغانانو له هر ډول فشار څخه ګټه واخیسته، خو کومه پایله یې نه ده ورکړې. اوسني شرایط هم د افغانستان او نړۍ تر منځ پر سیاسي تعامل منفي اغېز کوي. زما په نظر باید د فشار پر ځای د تعامل له لارو ګټه واخیستل شي.»
یو بل سیاسي شنونکی مطیع الله ارین پور هم د نړیوالې ټولنې د دغې کړنلارې مخالف دی او وایي چې دغه ډول اقدامات د افغانستان د ستونزو د حل نسخه نه شي کېدای.
«نړیواله ټولنه په دغسې اقداماتو سره غواړي پر اسلامي امارت خپلې غوښتنې ومني. خو د اسلامي امارت د مشر اوسني پرېکنده دریځ ته په کتو فکر نه کوم چې اوسنی نظام دې دغسې فشارونو ته تسلیم شي.»
بلخوا، د اسلامي امارت ویاند ذبیح الله مجاهد هم له کلید راډیو سره په خبرو کې یو ځل بیا له امریکا او نورو هېوادونو څخه وغوښتل چې پر اسلامي امارت د دغسې فشارونو عملي کېدل پایته ورسوي.
«پر اسلامي امارت بندیزونه کومه پایله نه ورکوي، سرچپه پر لېرېوالي او د باور په له منځه وړلو منفي اغېز کوي. اسلامي امارت د دغسې غیر قانوني فشارونو له منځه وړلو غوښتنه کوي. ځکه بیرته ناکامو لارو ته تګ منطقي نه دی.»
د اسلامي امارت د مسوولینو په خبره، همدا اوس د اسلامي امارت ۲۵لوړپوړي غړي د ملګرو ملتونو په تور لېست کې شامل دي.
تر دې وړاندې د روسیې حکومت اعلان کړی چې دوی له تور لېست څخه د اسلامي امارت د مشرانو د نومونو پر له منځه وړلو غور کوي.
