د افغانستان لپاره د روسیې ځانګړي استازي ضمیر کابلوف ټاس خبري اژانس ته ویلي چې روسیه، چین، ایران او پاکستان به د روانې جنورۍ میاشتې په وروستیو کې د افغانستان په اړه ناسته وکړي.
کابلوف د دغې ناستې اجنډا د اسلامي امارت له چارواکو سره د ټولګډونه حکومت جوړولو او له ترهګرۍ او نشه یي توکو سره د مبارزې په برخه کې تعامل یاد کړی دی.
ومو غوښتل چې د دغې غونډې په اړه د اسلامي امارت د مسوولینو نظر واخلو، خو له هڅو سره سره ونه توانېدو.
د اسلامي امارت ویاند ذبیح الله مجاهد څو ورځې وړاندې د روسیې د بهرنیو چارو د وزیر سرګي لاروف د هغو څرګندونو په غبرګون کې چې ګواکي په افغانستان کې دې پراخبنسټه حکومت جوړ شي، ویلي وو چې د افغانستان حکومت اوس هم پراخ بنسټه دی او د نظام څرنګوالی د افغانستان کورنۍ موضوع ده.
«په نظام کې شمولیت او نه شمولیت، د نظام او حکومت څرنګوالی د یوه ملت مسوولیت دی. نور هېوادونه باید په دغو مسایلو کې لاسووهنه ونه کړي. بل دا چې اسلامي امارت د روسیې په ګډون له ټولو هېوادونو سره نېکې اړیکې غواړي او موږ هڅه کوو چې دا اړیکې عملي بڼه خپله کړي.»
د سیاسي چارو شنونکی شېرحسن حسن وایي چې دا د پخوانیو ناستو پر دوام یوه ناسته ده او ډېره تمه ورته نه شي کېدای: «دغه غونډه د نورو غونډو پر دوام یوه غونډه ده او کومه خاصه ځانګړتیا نه لري، یو تفاوت چې شته هغه دا دی چې په دې وروستیو کې د روسیې د بهرنیو چارو وزیر وویل چې له طالبانو سره خپله راشه درشه پالي، خو د رسمیت پېژندلو لپاره د دوی شرط دا دی چې دوی یو پراخ پنسټه حکومت جوړ کړي.»
د سیاسي چارو بل شنونکی امین الله احساس وایي، د سیمې هېوادونه هڅه کوي چې له افغانستان او اسلامي امارت د تعامل لپاره یوه اجماع رامنځته کړي: «دغه غونډې او ناستې هغه وخت اغېزناک تمامېدلای شي چې لومړی د اسلامي امارت استازي په کې ګډون ولري او دوهم دا چې په داسې مشخصو موضوعاتو بحث وکړي چې هغه د تطبیق وړ وي.»
له دې وړاندې هم په روسیه او ځینې نورو سیمه ییزو او ګاونډیو هېوادونو کې ورته ناستې شوې، خو کومه ځانګړې پایله یې نه درلوده.
