په اسلام اباد کې د امریکا له سفارت څخه په خپره شوې اعلامیه کې ویل شوي چې د دوی تر منځ د افغانستان پر روان حالت او د ښکېلو اړخونو جوړجاړي ته پر رسېدو بحث شوی دی.
په خپره شوې اعلامیه کې زیاته شوې چې په افغانستان کې د روانې جګړې پایته رسېدل د افغانستان او سیمې هېوادونو په ګټه دي.
خلیلزاد په ورته وخت کې په دوحه کې د افغانستان د اسلامي جمهوریت او طالب مشرانو تر منځ دوه ورځنۍ ناسته ګټوره بللې ده.
هغه پر خپل ټوېټرپاڼه د اختر مبارکۍ په پیغام کې ویلي چې افغان حکومت او طالبانو هوکړه کړې چې د جګړې پایته رسېدو او د سیاسي حل لپاره به د ورته غونډو جوړېدو ته دوام ورکوي.
نوموړي زیاته کړې، اوس هغه وخت رارسېدلی چې ښکېل اړخونه اوربند وکړي او د اختلافونو پایته رسېدو لپاره معنا لرونکې خبرې پیل کړي.
د یادولو وړ ده چې وړمه شپه په دوحه کې د افغانستان د حکومت او طالب مشرانو تر منځ دوه ورځنۍ ناسته پایته ورسېده.
په دغه ناسته کې ټینګار شوی چې د ستونزو د حل لپاره به ورته نورې غونډې هم جوړوي.
