هغه د سه شنبې په ورځ د لوی اختر پر لومړۍ ورځ د اختر تر لمانځه وروسته طالبانو ته په خطاب کې وویل چې ایا دغه ډله د افغانستان لپاره یوه ذره مثبت پیغام هم لري؟
هغه زیاته کړه چې د نن افغانستان د ۲۰ کلونو وړاندې نه دی او طالبان د جګړې له لارې نه شي بریالي کېدای.
د جمهور رییس په وینا، د پنځه زره طالب بندیانو خوشي کېدل یوه تېروتنه وه او مسولین یې نړیواله ټولنه او هغه افغانان دي چې د حکومت پر نیت شک لري.
ده همدارنګه وویل چې طالبان یوازې د ویجاړۍ په اړه فکر کوي او په دې وروستیو کې یې ۲۶۰ ودانۍ تخریب کړې دي.
دا په داسې حال کې ده چې طالبان تل حکومت ملامتوي چې سولې ته ژمن نه دی او په دې لاره کې یې خنډونه جوړ کړي دي.
