نوموړي ویلي، د سولې خبرو لپاره بشپړ ژمن دی او د همدې لپاره یې سیاسي دفتر پرانیستی ترڅو یوې پایلې ته ورسي.
د طالبانو مشر د ستونزو پر حل ټنیګار کړی او وایي، یوازینۍ لار خبرې دي چې افغانستان له فعلي وضعیت څخه ژوغورلی شي.
«موږ د مذاکراتو او سیاسي بهیر د ښه پرمختګ لپاره سیاسي دفتر پرانستی دی، قوي مذاکراتي ټيم مو مؤظف کړی دی، له خپله لوري د خبرو اترو د لارې د مسئلې حل ته ژمن یو، خو متأسفانه چې مقابل جهتونه لا هم وخت ضایع کوي، پیغام مو دادی چې پر بهرنیانو د اتکا پرځای راځئ چې خپلې ستونزې پخپله حل کړو او هېواد له فعلي وضعیت څخه وژغورو.»
نوموړي همدارنګه په خپل پیغام کې ویلي، له افغانستان څخه د بهرنیو ځواکونو وروسته، د امریکا په شمول له ټولې نړۍ سره د متقابل تعامل او تعهداتو په چوکاټ کې ښې او پياوړې دپلوماتیکي، اقتصادي او سیاسي اړیکې غواړي او دا یې د ټولو جهتونو اړتیا بللې ده.
دا په داسې حال کې ده چې په دوحه کې د افغان حکومت او طالبانو د لوړو پوړو پلاوو ترمنځ د بین الافغاني خبرو لړۍ پیل شوې او تمه شته چې یوې پایلې ته ورسي.
کلید ګروپ په ټویټر او فیسبوک کې وګورئ
