د جمهوري ریاست د ویاند مرستیال محمد امیري وایي، جمهور رییس پرون د امریکا په ګډون د یو شمېر نورو هېوادونو له استازو سره وکتل.
هغه زیاتوي، جمهور رییس د دغه سفر پر مهال د ازبکستان هېواد له جمهور رییس «شوکت میرضیایف» سره په کتنه کې دواړو لورو د اقتصادي ودې، ښې حکومتولۍ، اصلاحاتو، سیمه ییز اتصال، د وچکالۍ اغېزو راکمولو په برخه کې د هېوادونو د ګډو همکاریو او ډيجیټلي کېدو پروسې په اړه بحث او خبرې وکړې.
جمهور رییس همدارنګه د چین، ترکیې او د امریکا متحده ایالاتونو له پلاوو سره هم کتلي دي.
جمهوري ریاست ماڼۍ همدارنګه وایي له امریکایي پلاوي سره د جمهو رییس د کتنې پر مهال د افغان امنیتي او دفاعي ځواکونو د ملاتړ، پراختیایي او بشري مرستو او سولې پروسې د چټکولو په اړه د امریکا د ژمنو په هکله بحث وشو.
د امریکایي پلاوي مشرې جمهور رییس غني ته ډاډ ورکړی چې هېواد به یې له افغانستان سره په یادو برخو کې کړې ژمنې ژر تر ژره عملي کړي.
