د دواړو لورو تر منځ په کتنه کې د افغانستان د سولې پر مسله او دوه اړخیزو موضوعاتو بحث وشو.
په ورته وخت کې نوموړي د ملي امنیت له سلاکار ډاکتر حمدالله محب سره هم کتلي دي.
په همدې تړاو د امنیت شورا په خبرپاڼه کې راغلي چې په ترسره شوې کتنه کې دواړو لورو د سولې پروسې پر چټکتيا او د خبرو له لارې د جګړې پر حل خبرې وکړې.
خبرپاڼه زیاتوي، قحطاني يو ځل بيا ټينګار وکړ چې هېواد به يې د افغانستان په رهبرۍ د سولې ملاتړ ته دوام ورکړي.
د قطر هېواد د بهرنیو چارو وزارت دغه ځانګړی استازی پر داسې مهال کابل ته راغلی چې په دوحه کې د مرکچي پلاوو تر منځ د سولې خبرې په ټپه درېدلې دي.
خو د افغانستان د مصالحې شورا بیا وایي چې ډېر ژر به د سولې په تړاو جدي خبرې پیل شي.
