له یاد وزارت څخه په خپره شوې خبرپاڼه کې راغلي چې په دې کتنه کې حنیف اتمر د افغان سولې له پروسې څخه د قطر هېواد له ملاتړه مننه کړې او د خبرو مېز ته یې د طالبانو پر بیا ګرځېدو ټینګار کړی دی.
د بهرنیو چارو وزیر همدارنګه په هېواد کې د طالبانو له خوا اوسنی تاوتریخوالی غندلی او زیاته کړې یې ده چې له نورو ډلو سره د طالبانو د اړیکو درلودل د دوحې له هوکړې سره په ټکر کې دي.
په ورته وخت کې د قطر هېواد د بهرنیو چارو وزارت ځانګړي استازي د بین الافغاني مذاکراتو پر بیا پیلېدو او د تاوتریخوالي پر مخنیوي ټینګار کړی دی.
دا څرګندونې پر داسې مهال مطرح کېږي چې په دوحه کې د افغانستان د سولې مذاکرات په ټپه درېدلي او په ورته وخت کې تاوتریخوالی هم اوج ته رسېدلی دی.
دواړه لوري د خبرو درېدو مسولیت پر یو بل اچوي.
