د دغه هېواد د بهرنیو چارو وزارت ځانګړي استازي «مطلق قحطاني» «د امریکایي او ناټو سرتېرو تر وتلو وروسته په افغانستان کې د سولې» تر سرلیک لاندې یوې انلاین غونډې ته دا څرګندونې کړې دي.
نوموړي هندو ورځپاڼې ته ویلي، افغانستان د سولې په تړاو چې هره لیدنه ترسره کېږي، باید د ښکېلو لورو تر منځ د اختلافونو د حل لامل شي.
د قطر هېواد دغه چارواکي ټینګار کړی چې یاد هېواد هغه ډله په رسمیت نه پېژني چې د زور له لارې واک ته ورسېږي.
د ده په وینا، افغانستان باید تر دې وروسته د نیابتي جګړې په ډګر بدل نه شي.
د راپورونو له مخې، په تېرو دوو اونیو کې د هندوستان د بهرنیو چارو وزیر دوه ځلې قطر هېواد ته سفر کړی دی.
تر اوسه د هند حکومت په دې اړه رسنیو ته څه نه دي ویلي او نه هم طالبانو د دوی او هندي چارواکو تر منځ لیدنه په رسمي ډول تایید کړې ده.
