هغه که څه هم له ایران، تاجکستان او یو شمېر نورو هېوادونو څخه افغانستان ته د اکسېجن د رالېږد خبر ورکوي، خو په ورته وخت کې د اکسېجن پر سم لګښت هم ټینګار کوي.
وحیدالله مجروح په جولای میاشت کې له هندوستان څخه د ۴۶۸ زره ډوزه نورو واکسینو د رالېږد خبر ورکوي او زیاتوي چې په همدې میاشت کې به امریکا هم په پراخه کچه له افغانستان سره د کورونا ضد واکسین مرسته وکړي.
چین او هندوستان هغه هېوادونه دي چې له افغانستان سره یې د کورونا زرګونه ډوزه واکسین مرسته کړې.
د روغتیا وزارت د معلوماتو له مخې، دا واکسین هغو کسانو ته ورکول کېږي چې عمرونه یې له ۵۵ کلونو لوړ وي، پر شکر او ورته نورو ناروغیو اخته وي.
همدارنګه روغتیایي کارمندانو، استادانو او یو شمېر نورو دولتي مسولینو ته لومړیتوب ورکول کېږي.
دا په داسې حال کې ده چې کورونا ویروس تر اوسه په ټول افغانستان کې تر څلور زره ډېر کسان مړه کړي او تر سل زره ډېر نور پرې اخته شوي دي.
