حمدالله محب پر خپله ټوېټر پاڼه لیکل، طالبانو په ټول هېواد کې د خلکو پر وړاندې تاوتریخوالی پیل کړی او دا معلومه ده چې یاده ډله د څه لپاره دا هرڅه کوي؛ خو قریشي یا ناخبره دی او یا له طالبانو سره همکار دی.
د نوموړي به خبره قریشي ممکن دا هم رد کړي چې اسامه بین الادین د پاکستان نظامي قرارګاه ترڅنګ موندل شوی و.
د پاکستان د بهرنیو چارو وزیر شاه محمود قریشي له طلوع ټلوېزیون سره په مرکه کې ویلي چې په افغانستان کې د طالبانو لخوا د تاوتریخوالي د ډېرېدو په تړاو مبالغه کېږي.
نوموړي ویلي چې د داعش په شان ورانکاري عناصر او په افغانستان کې دننه ځینې ډلې چې ګټې یې په جګړې کې دي، د تاوتریخوالي په تازه پیښو کې لاس لري.
دا په داسې حال کې ده چې په دې ورستیو کې د افغانستان په ۲۰۰ جبهو کې د افغان ځواکونو او طالبانو ترمنځ جګړې دوام لري چې د ښکېلو لورو ترڅنګ پکې ګڼ شمېر ملکي وګړو ته مرګ ژوبله اوړي.
کلید ګروپ په ټویټر او فیسبوک کې وګورئ
