له ارګ څخه په خپره شوې خبرپاڼه کې راغلي دي، چې پرون د جمهوررییس محمداشرف غني په مشرۍ د امنیتي او دفاعي سکتور د ارشد مسوولینو په ګډون امنیتي غونډه په ارګ کې تر سره شوه.
د خبرپاڼې له مخې په دغه غونډه کې والیانو، د قول اردوګانو او امنیه قومندانانو او د ولایتونو د ملي امنیت رئیسان د ویډیو کنفرانس له لارې برخه اخیستې وه، جمهوررییس غني د هېواد د بېلابېلو ولایتونو د امنیتي وضعیت د ښه والي او د امنیتي او دفاعي ځواکونو د سوق او ادارې په اړه د ملي دفاع وزارت لوی درستیز او د یادو مسوولینو راپور واورېد.
جمهوررییس د هېواد د بېلابېلو ولایتونو د امنیت د تامین په اړه د لاغوره تدابیرو په موخه امنیتي او دفاعي مسوولینو او والیانو ته لازمې لارښوونې وکړې.
جمهوررییس دا لارښوونې داسې مهال کوي، چې د هېواد په څو ولایتونو کې د افغان دولت او طالبانو ترمنځ د سختو جګړو له کبله افغان ځواکونو له یو شمېر ولسوالیو څخه تکتیکي شاتک کړی او طالبان بیا د ۳۸ ولسوالیو د نیولو ادعا کوي.
د افغانستان دفاع وزارت بیا وایي، ډېر ژر به هغه سیمې له طالبانو ونیسي، چې افغان ځواکونو د ملکي مرګ ژوبلې د مخنیوي په هدف تکتیکي شاتګ کړی.
کلید ګروپ په ټویټر او فیسبوک کې وګورئ
