هغه زیاتوي چې د چین له لوري افغانستان ته ۷۰۰ زره ډوزه واکسین رارسېدلی او ټاکل شوې چې ترسبا ټولو لېرې پرتو ولایتونو ته هم واستول شي.
د مجروح په خبره، د واکسین په لومړي پړاو کې یو میلیون ډوزه واکسین په هېواد کې په شفاف ډول پلي شول او هیله څرګندوي چې نوي واکسین به هم په ډېره شفافه بڼه تطبیق شي.
نوموړی همدارنګه وایي، روغتیایي کارمندان، افغان سرتېري، ښوونکي، د بانکونو، ټرانسپورټ وزارت او نورو ادارو کارمندان او هغه کسان چې عمرونه یې تر ۵۵ کلونو لوړ وي، په سرطان، شکر او ورته نورو ناروغیو اخته وي، په دغه پړ او کې به واکسین شي.
د یادولو وړ ده چې لاهم هېوادوال په روغتونونو کې د اکسېجن پر کمېدو نیوکه کوي، خو د روغتیا سرپرست وزیر وایي چې په یوه شپه او ورځ کې په هېواد کې تر دوه زره بالونه ډېر اکسېجن تولیدېږي او د ډېرېدو لپاره یې هڅې روانې دي.
دا مهال په هېواد کې تر ۸۰ زره ډېر کسان پر کورونا اخته شوي او تر درې زره نور ترې مړه شوي دي.
