د مرکچي پلاوي پر ټوېټرپاڼه لیکل شوي چې په دې ناسته کې ملګرو ملتونو استازو د افغانستان د سولې له پروسې یو ځل بیا ملاتړ اعلان کړی او په دې برخه کې یې د ملګرو ملتونو رول مهم بللی دی.
دوی هیله څرګنده کړې چې له طالبانو سره په دا ځل خبرو کې به پر مهمو مسایلو خبر وشي او هغه پرمختګ چې د افغانستان د خلکو د خوښۍ لامل کېږي، تر لاسه شي.
په ورته وخت کې طالبان هم د قطر د سیاسي دفتر د مرستیال شېر محمد عباس ستانکزي او ملګرو ملتونو د استازو تر منځ د کتنې خبر ورکړی.
ډاکتر محمد نعیم وایي، په دې کتنه کې طالبانو یو ځل بیا د سولې په اړه هوډ څرګند کړی او له افغانستان سره په بشري برخو کې پر مرستو خبرې وشوې.
دا کتنې پر داسې مهال ترسره کېږي چې ټاکل شوې ډېر ژر د افغان حکومت او طالبانو تر منځ په دوحه کې د سولې خبرې بیا پیل شي.
کلید ګروپ په ټویټر او فیسبوک کې وګورئ
