خبرپاڼه زیاتوي، په دغو ټلیفوني خبرو کې د پاکستان د بهرنیو چارو وزیر په افغانستان کې د تاوتریخوالي پر کمېدو، د تلپاتې اوربند پر اعلان او سیاسي حل لارې ته د رسېدو لپاره له اوسني فرصت پر ګټې اخیستنې ټینګار کړی.
قریشي زیاته کړې چې په افغانستان کې تلپاتې سولې ته رسېدل د ټولو مسولیت دی.
هغه په ورته وخت کې په مسولانه ډول له افغانستان څخه د بهرنیو ځواکونو پر وتلو هم ټینګار کړی.
امریکا او پاکستان پر داسې مهال د افغانستان د سولې پر مسله خبرې کوي چې په هېواد کې تر درې ورځني اوربند وروسته یو ځل بیا تاوتریخوالي زور اخیستی چې پر مهال دواړو لورو ته د مرګ ژوبلې اوښتو خبرونه ورکړل شوي. د دې تر څنګ ټاکل شوې چې د افغانستان د سولې په تړاو په ترکیه کې هم ناسته وشي.
که څه هم طالبانو په دې غونډه کې خپل ګډون رد کړی و، خو ځینو بهرنیو رسنیو ویلي چې طالبان په دې ناسته کې ګډون ته په دې شرط چمتو شوي چې وروستۍ خبرې به په دوحه کې کېږي.
