له دغه وزارت څخه په خپره شوې خبرپاڼه کې راغلي، افغان سرتېري پر دې توانېدلي چې دا سیمه د وسله والو طالبانو له شتون پاکه کړي او هغوی ته درنه مرګ ژوبله واړوي.
د دغو عملیاتو په پایله کې ۱۲ طالبان وژل شوي او اته نور ټپیان شوي دي.
د سرچینې په وینا، په پیل شوو عملیاتو کې د طالبانو یو پټنځی، یو موټر او یوه اندازه وسلې او مهمات هم له منځه وړل شوي.
د یادولو وړ ده چې وړمه شپه ناوخته د افغان حکومت او طالبانو تر منځ د اختر په مناسبت اعلان شوی اوربند پایته ورسېد.
د بغلان تر څنګ په هلمند او ګڼو نورو سیمو کې هم د طالبانو پر وړاندې د افغان سرتېرو پراخه عملیات پیل شوي دي.
تر اوسه طالبانو په دې اړه غبرګون نه دی ښودلی.
