له د افغانستان د امنیت شورا څخه په خپره شوې خبرپاڼه کې راغلي چې حمدالله محب ننګرهار ته په رسېدو سره د یاد ولایت له والي ضیاالحق امرخېل او یو شمېر نورو امنیتي چارواکو سره ناسته کړې او د امنیتي وضعیت په تړاو ورسره غږېدلی دی.
خبرپاڼه زیاتوي، د ملي امنیت سلاکار امنیتي مسوولین ته خبرو کې وویل، خلک له حکومته د امنیت د تامین توقع لري نو اړتیا ده چې د خلکو د ځان، مال، عزت، تاریخ او ابرو د ساتنې لپاره له ټولو موجودو امکاناتو کار واخېستل شي.
نوموړي همدارنګه په خپلو خبرو کې زیاته کړه ننۍ جنګ د افغانستان د خاورې او خلکو د ساتنې او بقا په خاطر دی او د دې لپاره د دیني عالمانو او فرهنګیانو رول مهم دی.
د افغانستان د ملي امنیت سلاکار حمدالله محب دا خبرې داسې مهال کوي چې نن د هېواد په دوو ولایتونو کندهار او کندز کې د چاودنو له کبله یو شمېر ملکي وګړو ته مرګ ژوبله واوښته، په داسې حال چې د افغان حکومت او طالبانوترمنځ د اختر په مناسبت د اوربند لومړۍ ورځ پیل شوې ده.
کلید ګروپ په ټویټر او فیسبوک کې وګورئ
