له دغه وزارت څخه په خپره شوې خبرپاڼه کې راغلي چې په دې انلاین ناسته کې امریکایي لوري په تېرو دوو لسیزو کې په هېواد کې د ډیموکراسۍ د لاسته راوړنو پر خوندیتوب ټینګار وکړ.
خبرپاڼه زیاتوي، امریکایي سناتورانو همداراز د سولې په خبرو او د هېواد په راتلونکي کې د افغان مېرمنو فعاله ونډه د هغوی حق وګاڼه او د تلپاتې سولې په خوندیتوب کې یې د مېرمنو پر رول ټینګار وکړ.
د کانګرېس غړو ژمنه کړې چې د افغان مېرمنو له لوري مطرح شوې اندېښنې به له خپلو همکارانو سره شریکوي او د افغانستان ملاتړ ته به دوام ورکوي.
بلخوا، د افغانستان د ملي شورا ښځینه غړو د امریکا د کانګرېس له استازو غوښتي چې د افغانستان د خلکو اندېښنو ته په پام د ښځو او ځوان نسل ملاتړ ته دوام ورکړي.
د ملي شورا استازو په هېواد کې د تاوتریخوالي زياتيدل، د هدفي وژنو دوام، له القاعدې او نورو سازمانونو سره د طالبانو دوامداره اړیکې د دوحې له تړون ښکاره سرغړونه بللې او پر امریکایي استازو یې غږ کړی چې طالبان تلپاتې اوربند ته وهڅوي.
