د سرچینې په وینا، د طالبانو له خوا د بهرنیو سرتېرو له اډو ساتنه د دوحې د تړون له مخې شوې ده.
په ورته وخت کې د افغانستان د ملي امنیت شورا سلاکار ډاکتر حمدالله محب که څه هم په دې اړه بې خبري څرګندوي، خو زیاتوي چې طالبان له هرې شونې لارې ګټه اخلي، څو په دې سره قدرت تر لاسه کړي.
طالبانو بیا دغه خبر رد کړی دی.
د دې ډلې د قطر دفتر ویاند ډاکتر نعیم وایي، هغه اوازې حقیقت نه لري چې ګواګي طالبانو دې د بهرنیو سرتېرو د اډو امنیت خوندي ساتلی وي.
دا په داسې حال کې ده چې د دوحې له تړون وروسته په افغانستان کې هېڅ بهرنی سرتېری نه دی وژل شوی، خو برعکس د افغان سرتېرو او طالبانو تر منځ درنې جګړې شوې دي.
