له دغه وزارت څخه تېره ورځ ناوخته په خپره شوې خبرپاڼه کې راغلي، د هېواد هوایي ځواکونو د کندهار په پنجوایي ولسوالۍ کې د طالبانو هغه موټر بم برید له منځه وړی چې پر افغان سرتېرو یې د برید لپاره چمتو کړی و.
خبرپاڼه زیاتوي، د دغه موټر بم برید په له منځه وړلو سره د سترې ترهګریزې پېښې مخه ونیول شوه.
که څه هم دفاع وزارت دا موټر بم برید د طالبانو اړوند یادوي، خو دې ډلې تر اوسه په دې اړه غبرګون نه دی ښودلی.
تر دې وړاندې هم د کندهار په ګډون د هېواد په یو شمېر نورو ولایتونو کې هم د موټر بم بریدونو مخه نیول شوې ده.
