د اسوشېټېډ پرېس د راپور له مخې، نوموړي پرون کانګرس ته په وینا کې ویلي، په کابل کې د امریکا سفارت د خوندیتوب لپاره هم د افغان حکومت پر وړتیا شک لري.
امریکايي رسنۍ وایي، د دغه هېواد پوځي قومندانانو له افغانستان د خپلو ټولو ځواکونو وتل نه غوښتل.
مکنزي د وسله والو ځواکونو په کمېټه کې ویلي، که امریکايي ځواکونه ووځي، د هوايي څار یا ترهګرۍ ضد بریدونو لپاره به افغانستان ته د وسله والو بې پیلوټه او نورو جنګي الوتکو تګ راتګ له څلورو ساعتونو ډېر وخت ونیسي.
تر دې مخکې د امریکا دفاع وزیر لویډ استین د ناټو مرکز کې وویل، چې امریکا تر وتلو وروسته هم د افغانستان ملاتړ روان ساتي.
