د ارګ له لوري په خپره شوې خبرپاڼه کې لیکل شوې چې په ترسره شوې کتنه کې د افغانستان او استونیا تر منځ د اړیکو د پراختیا، له افغانستان څخه د امریکایي ځواکونو د وتلو پرېکړې، د افغانستان او نړیوالې ټولنې او ناټو سازمان غړو هېوادونو ترمنځ د مناسباتو د نوي څپرکي په اړه بحث او خبرې وکړې.
جمهور رییس غني له افغانستان سره په بېلابېلو برخو کې د استونیا هېواد د مرستو او همکاریو او د غوڅ ملاتړ ماموریت په چوکاټ کې د دغه هېواد ځواکونو له فعالې ونډې مننه کړې ده.
د هېواد جمهور رییس د ډیجیټلي کولو په برخه کې د استونیا هېواد د لاډېرې همکارۍ غوښتنه کړې.
د دې کتنې په وروستیو کې د استونیا جمهور رییسې افغان لوري ته له افغانستان سره د استونیا د پیاوړو او غښتلو اړیکو د دوام ډاډ ورکړ.
هغې د مصالحې شورا له مشر عبدالله عبدالله سره هم په کتنه کې د ترکيې پر کنفرانس، د دوحې پر مذاکراتو، ملي اجماع او پر سیمه ییزو اړیکو بحث کړی.
د استونیا جمهور رییسه پر داسې مهال کابل ته راځي چې ټاکل شوې چې په مې میاشت کې له افغانستان څخه د بهرنیو سرتېرو وتلو لړۍ پیل شي.
استونیا هم هغه هېواد دی چې ګڼ شمېر سرتېري یې د ناټو په چوکاټ کې په افغانستان کې مېشت دي.
