له دغه وزارت څخه په خپره شوې خبرپاڼه کې راغلي، پرون تر غرمې وروسته د غزني ولایت د قرهباغ ولسوالۍ په «پیروګي» کلي کې طالبان د ماین جوړولو په یوه کار خونه کې د ماین جوړېدو او انتقال په حال کې وو چې ماین چاودنه وکړه.
خبرپاڼه زیاتوي، په دې چاودنه کې د عمري په نوم د وسله والو طالبانو د یو مهم غړي په ګډون ۱۷ طالبان وژل شوي دي.
بلخوا، د غزني سیمهییز چارواکي د قرهباغ ولسوالۍ د سقوط مخنیوي خبر ورکوي.
د دغه ولایت د والي ویاند واحدالله جمعه زاده وایي، په تېره یوه اونۍ کې طالبانو د یادې ولسوالۍ د سقوط پلان درلود، خو په خبره یې، د هغوی دغه پلان د افغان سرتېرو له لوري شنډ شوی او د ولسوالۍ د سقوط مخه نیول شوې ده.
د یادولو وړ ده چې تېره ورځ د قرهباغ ولسوالۍ په مربوطاتو کې د ملکي خلکو پر موټر د طالبانو په ماین چاودنه کې درې ملکي وګړي ټپیان شوي وو.
وسله والو طالبانو تر اوسه د امنیتي چارواکو د دې ادعا په تړاو غبرګون نه دی ښودلی.
