د ارګ له لوري خپره شوې خبرپاڼه وایي، جمهور رییس دې غونډې ته په خبرو کې ویلي چې افغان سرتېري د خپلې خاورې د ساتنې لپاره پوره چمتووالی لري او اوس هغه وخت را رسېدلی چې د هېواد ملي حاکمیت په بشپړ ډول خوندي شي.
نوموړي همداراز زیاته کړې، طالبان د جګړې د دوام لپاره هېڅ راز دیني مشروعیت نه لري او د اسلامي نړۍ دیني عالمانو د افغانستان جګړه ناروا بللې ده.
هغه د سیمې له هېوادونو سره د اړیکو بیاکتنې ته په اشارې ویلي، د پاکستان لپاره د پرېکړې ورځ ده، که افغانستان ناارامه وي، پاکستان به هم ناارامه وي او که پاکستان زموږ هوساینه غواړي، دوی به هم هوسا شي.
جمهور رییس د خپلو خبرو په پای کې پر طالبانو غږ کړی چې که دا ډله سوله کوي، د افغانانو غېږه ورته پرانیستې او په وینا یې، له هغه پرته بل هر انتخاب د جګړې د دوام لپاره د طالبانو پلمه ده.
