ads

ناڅرګند حالت

د امریکا متحده ایالاتو جمهور رییس جو بایډن رسما اعلان وکړ چې امریکايي ځواکونه به د روان میلادي کال د سپټمبر پر یوولسمه نېټه له افغانستان څخه وځي. ناټو هم ورته پرېکړه کړې او ويلي یې دي چې تر هغې نېټې به کرار کرار خپل ټول ځواکونه وباسي. که څه هم دا موضوع یوه ورځ مخکې هم په بهرنیو رسنیو کې شریکه شوې وه او طالبانو ویلي وو، که بهرني ځواکونه ونه وځي، پر وړاندې به يې جنګېږي او په هېڅ یوه غونډه کې چې د افغانستان د سولې په اړه جوړېږي، ګډون نه‌کوي؛ خو دغو مواردو ته په پام به ولیدل شي چې وضعیت پر کوم لوري روانېږي.

کلید
26 وری 1400
ناڅرګند حالت

جوبایډن له دې اعلان سره دا هم ویلي چې تر وتلو وروسته به له افغانستان سره د امریکا مرستې دوام کوي، خو نور به په نظامي ډول په افغانستان کې ښکېله نه وي.
بایډن د سپټمبر پر ۱۱ مه د ځواکونو د وتلو پرېکړه قطعي بللې، خو پوښتنه دا ده چې طالبان به کوم ډول دريځ غوره کوي، ایا جنګ ته به مخه کړي او یا د مذاکراتو مېز ته به راوګرځي؟ سره له دې چې د طالبانو د وروستي غبرګون له مخې ډېری افغانان د جګړو د بیا پیل په اړه اندېښمن ښکاري، خو شنونکي په دې نظر دي چې د بايډن دا اعلان له افغانستان څخه د امریکايي ځواکونو وتل یقیني کوي او اوس د طالبانو وار دی چې خپل ښه نیت څرګند او د استانبول په غونډه کې ګډون وکړي. دوی دا خبره ځکه کوي چې تر دې وړاندې څو ځله امریکايي چارواکي او جوبایډن د امریکايي ځواکونو وتلو په اړه مبهم غږېدلي وو او بایډن ویل چې د تخنیکي او لوژیستيکي ستونزو له کبله په ټاکل شوې نېټه د ځواکونو ایستل سخت دي؛ خو اوس د دغو ځواکونو د وتلو لپاره دقیقه نېټه ښودل شوې او ناټو هم ورسره همغږې شوې ده.
که څه هم په ښکاره د جګړې ښکېلو لوريو تراوسه په ځینو ناستو کې چې په افغانستان کې د سولې د رامنځته کېدو لپاره شوي، ګډون کړی او په دې ډول يې ښودلي چې سوله غواړي، اوس پکار ده چې په حقیقي ډول له دغه بهیر سره ملګري شي او د بهرنیو ځواکونو تر بشپړ وتلو د سولې پر سر یو توافق ته ورسېږي. په دې برخه کې خلک اوربند یو اصل بولي او له ښکېلو لوریو غواړي چې د خبرو اترو د پیلولو لپاره دې اصل ته مخه وکړي او دا دې څرګنده کړي چې په رښتیني ډول د سولې غوښتونکي دي او پرته له دې د سولې لپاره د دوی ادعاوې بې معنا دي.
له خلکو سره د جګړې اندېښنه ځکه ډېره ده او تر پخوا لا زیاته شوې چې طالبانو په خپلو تازه څرګندونو کې د نړۍ مسلمانانو اتحاديې د جګړې د درولو غوښتنې ته د رد ځواب ورکړی او ویلي يې دي چې د روژې په میاشت کې جګړه ثواب لري. د راپورونو پر بنسټ په تېرو درېيو میاشتو کې په رامنځته شویو بریدونو کې ۵۷۳ تنه ملکي وګړي وژل شوي او ۱۲۰۰ تنه نور ټپیان شوي دي چې د وژل شويو او ټپیانو ډېری برخه یې ښځې او ماشومان دي. دا یو ناورین دی او دې ناورین ته دوام ورکول وطن او ولس له تباهۍ سره مخ کوي.
د همدغو اندېښنو په فضا کې افغانان له نړیوالې ټولنې غواړي چې په خپلو هڅو سره پرې نه‌ږدي چې ښکېل لوري جنګ او تاوتریخوالي ته مخه کړي.

کلید ګروپ په ټویټر او فیسبوک کې وګورئ
د تکشارک په واسطه پراختیا او طرحه جوړونه - Copyright © 2021

Copyright 2020 © TKG: A public media project of DHSA