نوموړي تېره شپه له جوبایډن سره په ټلیفوني خبرو کې دا څرګندونې کړې دي.
جمهور رییس پر خپله ټوېټرپاڼه لیکلي چې د امریکا له جمهور رییس جوبایډن سره یې ټلیفوني خبرې کړې او د امریکایي سرتېرو وتلو په اړه یې د هغه پرېکړه ستایلې ده.
ده زیاته کړې چې تر دې وروسته به د امریکا، ناټو او افغانستان تر منځ د همکاریو نوی پړاو پیل شي.
هغه په ورته وخت کې د افغان سرتېرو وړتیاوو ته په کتو ویلي چې دغه ځواکونه په بشپړه توګه له افغانستان څخه د دفاع وړتیا لري.
که څه هم افغان حکومت د امریکا د دې پرېکړې هرکلی کوي، خو ځینې افغان او امریکایي سیاستوال او نظامیان د بهرنیو سرتېرو وتلو اندېښمن کړي دي.
د دوی په وینا، که بهرني سرتېري افغانستان پرېږدي، هېواد به یو ځل بیا له کورنیو جګړو سره مخ شي.
