تر دې وړاندې د امریکا د دفاع وزارت ویاند جان کربي رسنیو ته په تازه څرګندونو کې ویلي وو، هر کله چې د امریکا جمهور رییس جوبایډن له افغانستان څخه د ټولو امریکایي سرتېرو د وتلو امر وکړي، دوی چمتو دي چې په کمه موده کې خپل سرتېري وباسي.
کربي زیاته کړې، د دفاع وزیر لویډ اسټین په کابل کې هم ویلي، کله چې بایډن له افغانستان څخه د امریکایي سرتېرو د ایستلو تصمیم ونیسي، نو جنرال کنېټ مککینزي او سکاټ مېلر به دا چاره په ښه ډول مخته یوسي.
خو د امریکا د استازو مجلس د دفاعي کمېټې مشر ادم سمېت بیا له رسنیو سره په خبرو کې ویلي، د بایډن اداره په دې لټه کې ده چې د مې تر لومړۍ نېټې وروسته هم په افغانستان کې خپل سرتېري وساتي.
طالبان بیا د دوحې د هوکړې له مخې پر ټاکلې نېټه له افغانستان څخه د ټولو ځواکونو پر وتلو ټینګار کوي.
