ملګري ملتونه په تخار ولایت کې د هوایي برید له کبله د ۱۲ماشومانو وژل کېدو په اړه د څېړنې خبر ورکوي.
په کابل کې د ملګرو ملتونو دفتر (یوناما) ویلي چې په تخار ولایت کې پر یوې مدرسې د هوایي بریدونو له کبله د ۱۲ماشومانو د وژل کېدو په اړه څېړنې کوي.
د دغه دفتر په خبرپاڼه کې ویل شوي چې تر څېړنو وروسته به معلومات له رسنیو سره شریک کړي.
بل لور ته له دفاع وزارت څخه د پنجشنبې په ورځ په خپره شوې اعلامیه کې ویل شوي چې د تخار ولایت په هزار قرلق ولسوالۍ کې پر هغو طالبانو برید شوی چې تېره ورځ یې په بهارک ولسوالۍ کې افغان سرتېرو ته درنه مرګ ژوبله اړولې وه.
د دفاع وزارت د اعلامیې له مخې، په دغو هوایي بریدونو کې ۱۲ طالبان وژل شوي دي.
بلخوا، د تخار سیمهییز چارواکي په دغه هوایي برید کې د ملکي وګړو د مرګ ژوبلې خبر ورکوي.
د دغه ولایت د والي ویاند جواد هجري د پنجشنبې په ورځ کلید ته وویل، په دې پېښه کې ۱۲ ماشومان وژل شوي او ۱۴ نور ملکي وګړي ټپیان شوي دي.
کلید ګروپ په ټویټر او فیسبوک کې وګورئ
