دوی وایي، هلته جګړو اړ کړي چې مرکز ته کډه وکړي، خو په وینا یې، اوس له ګڼو ستونزو سره مخ دي او د خوراکي توکو په ګډون د اوسېدو ځایونه هم نه لري.
دغه راغلي کډوال اوسمهال هلته تر شنه اسمان لاندې په خېمو کې ژوند کوي:
«ژمنی دی، هوا ډېره یخه ده، د اوسېدو ځای نه لرو او ماشومان مو هم ټول ناروغ دي. سیمهییز او ولایتي چارواکي دوکه راکوي او تر اوسه هېڅ مرسته نه ده راسره شوې.»
یاد کډوالو د جګړې له ښکېلو لورو غواړي چې روانې جګړې ته د پای ټکی کېږدي او د ملکي وګړو ژوند ته پام وکړي.
بلخوا، د هلمند ولایت د کډوالو چارو دریاست ریس سید محمد رامین وایي، په تېرو ۱۲ ورځو کې د دغه ولایت له ولسوالیو څخه د هلمند مرکز لښکرګاه ښار ته د دسروې له مخې، ۵۶۰۰ کورنۍ راغلې دي.
د ده په خبره، د همکارو موسیسو ټیمونه ګمارل شوي، څو له راغلو کډوالو سره مرسته وکړي:
«ډېرې کورنۍ له ناوې ولسوالۍ څخه مرکز ته راکډه شوې دي، موږ هڅه کوو چې د همکارو موسیسو په مرسته هغوی ته رسېدنه وشي.»
د دې تر څنګ، دهلمند د بشرحقونو د ولایتي دفتر مسول عبدالمقیم علیزی وایي، د دغه ولایت له بېلابېلو سیمو او ولسوالیو څخه ۹۵۰۰په شاوخوا کې کورنۍ بېځایه شوې، چې اوس مهال بیړنیو مرستو ته اړتیا لرې .
کابو ۱۳ ورځې کېږي چې د هلمند په ناوې، نهرو سراج او د دغه ولایت پر مرکز د طالبانو بریدونه روان دي. د نظامیانو تر څنګ ګڼو ملکي وګړو ته هم پکې د مرګ ژوبلې او له خپلو سیمو د بېځایه کېدو ادعاوې شوې دي.
کلید ګروپ په ټویټر او فیسبوک کې وګورئ
