د افغانستان د بهرنیو چارو له وزارت څخه پرون ناوخته په خپره شوې اعلامیه کې لیکل شوي چې د دغه وزارت رهبري د کونړ ولایت په مرورې ولسوالۍ کې د استوګنې پر کورونو د پاکستان راکیټي بریدونه غندي او دا کړنه د جدي اندېښنې وړ بولي.
اعلامیه زیاتوي چې د پاکستاني پوځ په پرونیو بریدونو کې یو تن ملکي وګړي خپل ژوند له لاسه ورکړی او درې ماشومان ټپیان شوي دي.
د سرچینې په وینا، پر افغان خاوره د پاکستان د راکیټي بریدونو دوام د دواړو هېوادونو تر منځ اړیکو ته زیان رسوي او دا کړنې د مقابل لوري د ژمنو خلاف عمل دی.
دا لومړی ځل نه دی چې پاکستاني پوځیان پر کونړ او د افغانستان پر نورو سیمو راکیټي بریدونه کوي، بلکې تر دې وړاندې هم ورته بریدونه ترسره شوي او ګڼو افغانانو ته پکې ځاني او مالي زیانونه اوښتي دي.
کلید ګروپ په ټویټر او فیسبوک کې وګورئ
