د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد پاکستان ته تللی او هلته یې د دغه هېواد د پوځ له لوی درستیز قمر جاوېد باجوه او نورو چارواکو سره کتلي دي.
په اسلام آباد کې د امریکا سفارت ویلي چې زلمي خلیلزاد سره په دغه سفر کې په افغانستان کې د ناټو عمومي قومندان جنرال سکاټ میلر هم ملتیا لري.
د دغه سفارت په اعلامیه کې ویل شوي چې پرون ماښام زلمي خلیلزاد او قمر جاوېد باجوه د افغان سولې پر روانو مذاکراتو بحث او خبرې کړي دي.
سرچېته زیاتوي چې دواړو لورو په افغانستان کې د تاوتریخوالي پر کمېدو ټینګار کړی.
دا په داسې حال کې ده چې تېره اوونۍ د ملي مصالحې عالي شورا مشر ډاکټر عبدالله عبدالله هم پاکستان د افغان سولې لپاره د سیمه ییزې اجماع د پیاوړتیا په هدف سفر کړی و چې، پاکستان ورته د بشپړې همکارۍ ډاډ ورکړی و.
کلید ګروپ په ټویټر او فیسبوک کې وګورئ
