له دغه وزارت څخه د چهار شنبې په ورځ په خپره شوې خبرپاڼه کې لیکل شوي، تېره شپه وسله والو ترهګرو غوښتل چې د هلمند په ګرشګ ولسوالۍ کې د ملي اردو پر پوسته موټر بم برید ترسره کړي، چې هدف ته تر رسېدو وړاندې د افغان سرتیرو له خوا له منځه وړل شوی دی.
له دفاع وزارت څخه په یوه بله خبرپاڼه کې راغلي چې یو ځانمرګي بریدګر د کندهار ولایت په میوند ولسوالۍ کې د افغان ځواکونو پر پوسته د موټر بم برید پلان درلود، چې دا هم هدف ته تر رسېدو وړاندې افغان سرتېرو په نښه کړی او له منځه یې وړی دی.
خبرپاڼه وایي، په دواړو پېښو کې د ملي اردو پنځه سرتیري سطحي ټپیان شوي دي.
بلخوا، د هلمند د والي ویاند عمر ځواک بیا کلید ته وویل، په ګرشک ولسوالۍ کې د موټر بم برید له امله څلور د ملي اردو سرتیري وژل شوي او درې نور ټپیان شوي دي.
تر اوسه وسله والو طالبانو او کومې بلې وسله والې ډلې په دې اړه رسنیو ته څه نه دي ویلي.
کلید ګروپ په ټویټر او فیسبوک کې وګورئ
