له دغه ریاست څخه د سه شنبې په ورځ کلید ته په رالېږل شوې خبرپاڼه کې ویل شوي چې ځانګړي ځواکونه یې د یو لړ هدفمندو عملیاتو په پایله کې پر دې توانېدلي چې په کابل ښار کې د طالبانو ۱۵ کسیزه ډله ونیسي.
د ریاست خبرپاڼه وایي، نیول شوي کسان په څلورو او یا پنځو ډلو کې تنظیمېدل او وروسته به یې خپل هدفي عملیات ترسره کول.
د سرچینې په وینا، یادو کسانو هوډ درلود چې په کابل ښار کې امنیتي او دفاعي ځواکونه او عام وګړي ترور کړي، خو هدف ته تر رسېدو وړاندې ونیول شول.
که څه هم د ملي امنیت ریاست نیول شوي کسان د طالبانو غړي بولي، خو تر اوسه دې ډلې په دې اړه غبرګون نه دی ښودل.
کلید ګروپ په ټویټر او فیسبوک کې وګورئ
